陳葒撐廣東話　廣東話可雅可俗

我係廈門人，細蚊仔時係講閩南話嘅。但自從11歲嚟咗香港後，廣東話就變咗係我嘅第一語言（即爆粗時自自然然會用嘅語言）。而家我寫文寫詩，周不時都會特登用廣東話口語來寫。

講古老，閩南話同廣東話有得揮。普通話嘅「鍋」，閩南話叫「鼎」，廣東話叫「鑊」，所謂「人為刀俎，我為鼎鑊」，真係旗鼓相當。而「筷子」係閩南話都仲叫緊「箸」，就比廣東話更古。之但係講到豐富鬼馬有活力，閩南話就唔係廣東話嗰皮。

廣東近海又早通商，接觸唔同地方嘅人事物多咗，語言詞彙自然更多更雜，用時也更精準。香港人喺呢個基礎下，兼修南洋風土東洋人情，並蓄西歐文化美加事物，詞彙就更多元細緻，更生動啜核，可以話係全中國最豐富多采最有活力嘅語言。

香港人講嘅廣東話，同廣東人講嘅廣東話，其實喺腔調同遣詞運句上都有啲分別，為避免混淆，下文以香港話專指香港人講嘅廣東話（只為行文方便，同乜獨物獨無關。戴定頭盔先，本人堅定不移地擁護一國兩制）。

香港話最犀非利嘅地方係可雅可俗，既可以「曳搖共對輕舟飄，互傳誓約慶春曉。」亦可以「為兩餐乜都肯制呀前世，扮蟹瀨嘢真正係呀滑稽。」雅時唔覺突兀，俗時唔覺核突。確係勁抽！

香港話唔係我母語，但我撑硬！

【更多母語報道】

【延伸閱讀】蔣雅文廣東話拍片宣傳台灣：用母語拍片是香港之光

【延伸閱讀】古巨基演唱會撐母語　基仔：唔好問我點解全晚都要廣東歌

【延伸閱讀】教育局教學資源網指「粵語非母語」　Ben Sir質疑矮化粵語

原文刊於《晴報》，標題經TOPick編輯修改，原題「香港廣東話」